Kryeministri pyet ndjekësit në ‘FB’: Cilat do ishin gjërat që do ndryshonit nëse do ishit kryeministër?

Pas fitores së thellë të Partisë Socialiste në zgjedhjet parlamentare të 25 qershorit, kryeministri Edi Rama nuk ka nguruar që të kërkojë sugjerime nga ndjekësit e tij në rrjetet sociale, tre gjëra që sipas tyre duhet të përmirësohen në vend. Me anë të një mesazhi në rrjetin e tij social Rama ritheksoi se fitorja dhe sigurimi i 74 mandateve nga PS ishte meritë e qytetarëve. “Çfarë duhet të korrigjojmë në përmbajtjen e në stilin e qeverisjes dhe si duhet e nmund ta përmirësojmë kulturën tonë qeverisëse, cilësinë e skuadrës që qeveris, në legjislativ e në ekzekutiv, bilancin qeverisës në çdo sektor”, pyet Rama ndjekësit e tij. “Çfarë duhet të përmirësojmë? Po e përsëris që fitorja i takon Shqipërisë dhe njerëzve të zakonshëm të saj, ndërsa e imja, e jona si të zgjedhur për të udhëhequr vendin, është vetëm barra e shumëfishuar e përgjegjësisë qeverisëse. Na duhet një reflektim i thellë brenda vetes, për të kuptuar me sa më shumë vërtetësi, çfarë duhet të korrigjojmë e përmirësojmë tek vetja, tek sjellja e puna e secilit prej nesh dhe e forcës sonë të madhe e të suksesshme, por edhe me jo pak të meta, Partisë Socialiste. Çfarë duhet të korrigjojmë në përmbajtjen e në stilin e qeverisjes dhe si duhet e mund ta përmirësojmë, kulturën tonë qeverisëse, cilësinë e skuadrës që qeveris, në legjislativ e në ekzekutiv, bilancin qeverisës në çdo sektor? Dhe më e rëndësishmja, si ta bëjmë këtë reflektim sa më gjithëpërfshirës, duke mos folur e dëgjuar vetëm mes njëri-tjetrit, po duke dëgjuar edhe të tjerët, njerëzit e zakonshëm të këtij vendi, sa më shumë prej tyre, qofshin ata që na kanë votuar qofshin ata që nuk na kanë votuar?”- pyet kryesocialisti Rama ndjekësit e tij virtualë në rrjetet sociale. Në vijim të reagimit të tij, kreu i qeverisë sqaron se qeverisja ndodhet në një fazë transitore ku po bëhen përgatitjet për qeverinë e re. “Po përgatitemi që në këtë fazë tranzitore deri në krijimin e qeverisë së re, të bëjmë një proces dëgjimor në të gjithë Shqipërinë, me disa nivele apo rrathë, brenda partisë dhe jashtë saj. Ju jam mirënjohës paraprakisht, për çdo sugjerim prej jush këtu në rrjetin tonë dhe për ta bërë ndoshta më të lehtë, komentin tuaj, po ju pyes: Nëse do të ishe ti kryeministri i Shqipërisë, cilat do të ishin tre gjërat më kryesore që do përmirësoje? Natyrisht, kushdo mund të dalë nga korniza e kësaj pyetjeje apo mund ta shpërfillë atë plotësisht, e të shkruajë atë që dëshiron. Faleminderit”- shkruan kreu i PS-së Edi Rama në mesazhin e tij drejtuar jo vetëm socialistëve.