Jozefina Topalli: Ajo që ndodhi më 25 qershor, ishte si një cunami. PD humbi 200 mijë vota

Partia Demokratike po kalon momente të vështira dhe gjithçka po ndodh si pasojë e rezultatit zhgënjyes që arriti PD nën drejtimin e Lulzim Bashës, i cili sipas një pjese të selisë blu duhet të dorëhiqet nga drejtimi i partisë. E përfshirë e para në këtë debat, ish-nënkryetarja e PD-së Jozefina Topalli i është rikthyer sërish analizës së shkaqeve që çuan në rezultatin më të dobët historik të kësaj partie që nga krijimi i saj. Në një intervistë për ABC Neës, Jozefina Topalli renditi shkaqet që sipas saj çuan PD drejt humbjes së 25 qershorit, me 200 mijë vota minus. Topalli e nis analizën e saj me krahasimin e rezultatit që mori PD në përballjen e saj më të vështirë, në vitin 1997. “Në 97 morëm një rezultat pak më të mirë se viti 2017. Kjo do të thotë se ka ndodh një cunami në 25 qershor”, u shpreh Topalli, duke shpjeguar për atë që ndodhi me strukturat e PD-së. “Mendova se do riniste organizimi i partisë, pas zgjedhjeve të 2013. Në shkurt të vitit 2014, Basha bëri një urdhër që për kryetarët e degëve dhe për kryetarët e grup-seksioneve nuk do të kandidonin as ish- deputetë, ish- ministra, ish- kryetarët e qarqeve, ish- kryetarë e grup-seksioneve e titullarë të tjerë. Se pse ne duhej të fajësonim kryetarët e grup-seksioneve, këtë nuk e kuptoja. Por edhe që ti heqësh të gjithëve të drejtën për të kandiduar, jo vetëm nuk e kuptoja por ai urdhër ishte i stilit stalinist. Unë ia kam thënë këtë Lulzim Bashës dhe ai u përgjigj se keni shumë të drejtë, por urdhëri vazhdoi dhe u penguan në rikandidim ish- kryetarët”, tha ajo. Topalli shpjegon se vendet bosh në strukturat e PD-së mbetën pa kryetarë për shkak se Basha kishte në plan të vendoste njerëzit e tij. Edhe atje ku ndodhën zgjedhje, u vendosën njerëzit pranë Bashës, u shpreh Topalli. “Gjatë 4 viteve nuk arriti të bëjë zgjedhje në struktura. Aty ku u bënë, u bënë me ndërhyrje të njerëzve afër tij, dhe struktura u degradua. Kjo është një nga arsyet që rezultati shkoi në minus 200 mijë vota nga zgjedhjet e kaluara. Fillimisht doja të besoj se është nga mosnjohja e partisë, por ajo që kuptova ishte se as nuk i interesonte ta njihte partinë. Kishte një synim tjetër që e kuptoja, e logjikoja e perceptoja, por nuk ia pranoja vetes se nuk kishte logjike politike dhe njerëzore për ta personalizuar partinë, se si në njjë shkollë, si në administratë, në profesion, ashtu edhe në një forcë politike duhet të ketë një meritokraci. Përmes rritjes së vlerave, besimit, vizionit, ëndrrës që i jep qytetarëve, i rrit votat”- u shpreh ajo. Një arsye tjetër që rendit Jozefina Topalli për humbjen është edhe mungesa e analizës pas humbjes së zgjedhjeve në viti 2015, duke llogaritur këtu edhe moskandidimin e tij. “Vetë moskandidimi i tij në bashki për shkak të performancës së dobët ishte dekurajuese për qytetarët e Tiranës dhe për ata të gjithë Shqipërisë, që do donin të shihnin kryetarin të rikandidonte. Humbja ishte e rëndë. Basha ishte shef shtabi. Kaloi nga humbja në humbje dhe nuk bëri një analizë” u shpreh dje në analizën e saj, ish-numri 2 i selisë blu, Jozefina Topalli.