Gjyqtaren Fildes Havizi, 39-vjeçaren nga Shkodra e vrau sistemi dhe po e rivrasin krijuesit e tij

Vrasja nga ish-bashkëshorti e Fildeze Hafizit, nënë e dy fëmijëve dhe gjyqtare në Shkodër u pasua me reagime të ashpra dhe zemërim, por përgjatë dy viteve të fundit, institucionet dështuan në vazhdimësi t’i ofronin asaj mbrojtje.

Vrasja e paralajmëruar e Fildeze Hafizit-nënë e dy fëmijëve dhe gjyqtare e Gjykatës së Shkodrës ka shkaktuar zemërim në Tiranë dhe ka rikthyer në vëmendje dështimin e vazhdueshëm të institucioneve shqiptare për t’u ofruar mbrojtje viktimave të dhunës në familje.

Hafizi, 39 vjeç, u ekzekutua me dy plumba të enjten në Tiranë, ndërsa policia arrestoi si autorin e dyshuar të krimit, ish-bashkëshortin e gjyqtares, Fadil Kasemi, 53 vjeç.

Të dhënat e ofruara nga dokumentet gjyqësore tregojnë se 39-vjeçarja Hafizi ndodhej prej më shumë se dy vitesh nën kërcënimin e vazhdueshëm të ish-bashkëshortit të saj, Fadil Kasemi dhe ndonëse e kishte denoncuar në gjykatë dhe prokurori, nuk ia doli të parandalonte fundin e saj tragjik.

Sipas vendimit të Gjykatës së Kavajës së datës 28 prill 2016, Fadil Kasemi u arrestua për herë të parë më 19 korrik të vitit 2015-vetëm pak muaj pas divorcit, pasi e përndoqi ish-bashkëshorten deri në plazhin e Golemit me një pistoletë në çantë dhe e dhunoi atë në sy të të birit.

“Fildesi i është lutur që të mos i linte fëmijët jetimë si dhe ka tentuar t’i marrë çantën. Fadili ka reaguar duke e goditur në fytyrë me grusht dhe e ka rrëzuar në rërë,” thuhet në vendimin e gjykatë.

Gjykata konstaton se çifti kishte pasur probleme dhe mosmarrëveshje kohët e fundit, të cilat e kishin shtyrë Hafizin të kërkonte urdhër mbrojtjeje në gjykatë dhe të kallëzonte ish-bashkëshortin në Prokurorinë e Tiranës për dhunë në familje dhe “kërcënim me pistoletë”.

Sipas vendimit, gjykata e kishte pushuar kërkesën për urdhër mbrojtjeje për shkak të mosparaqitjes së Hafizit e po ashtu, edhe prokuroria kishte vendosur mosfillimin e procedimit penal më 13.04.2015.

Pavarësisht konstatimit të dhunës së përsëritur, trupa gjyqësore e drejtuar nga gjyqtari Luan Lusha vendosi më 28 prill 2016 dënimin me 3 vjet burg për Fadil Kasemin-i cili përfitoi më parë edhe nga gjykimi i shkurtuar.

Megjithatë, Kasemi u lirua vetëm 1 vit e gjysmë pas arrestimit për shkak të ligjit “Për dhënie amnistie”. Urdhri i lirimit të parakohshëm të Fadil Kasemit, tregon se ai u lirua nga burgu i Rrogozhinës më 14 janar 2017, ndërsa iu falën 11 muaj e 8 ditë burg.

Publikimi i këtij fakti dhe i të dhënave të tjera që tregojnë se gjyqtarja Hafizi u braktis në fatin e saj shkaktuan reagime të forta në Tiranë./birn

URDHRI I LIRIMIT
Me vendimin Nr. 76 dt. 28.4.2016 të Gjykatës së Rrethit Kavajë shtetasi Fadil Kasemi deklaruar fajtor dhe dënuar me vendim të formës së prerë me 3 (tre) vite burgim, për kryerjen e veprës penale të “Prodhim dhe mbajtjes pa leje të armëve luftarake”, “Dhunë në familje”, parashikuar nga nenet 278/2, 130/a/4 të Kodit Penal, vendim i cili ka marrë formë të prerë më datë 14.09.2016. Për këtë vendim ka lëshuar Urdhër Ekzekutimi Prokuroria e Rrethit Kavajë më dt. 16.11.2016.

– I dënuari Fadil Kasemi është arrestuar më datë 19.07.2015 dhe ka përfituar 6 muaj e 23 ditë zbritje dënimi në bazë të nenit 57 të K.Penal dhe nuk ka përfituar ulje dënimi dhe deri më sot më datë 14.09.2016 nga dënimi i dhënë i mbeten për të vuajtur dhe 11 (njëmbëdhjetë) muaj e 8 ditë burgu.

– Në zbatim të Ligjit Nr. 141/2016 “Për dhënie Amnistie”, ky i dënuar përfiton ule të dënimit.
– I dënuari Fadil Kasemi lirohet sot më dt. 14.01.2017 me “Amnisti”.

Gjyqtaren Fildes Havizi, 39-vjeçaren nga Shkodra e vrau sistemi dhe po e rivrasin krijuesit e tij

Ngjarja e rëndë e shënuar sot në Tiranë ku shtetasi Fadil Kasemi ka qëlluar me armë për vdekje ish-bashkëshorten e tij, gjyqtaren 39-vjeçare Fildes Hafiz, ka tronditur opinionin publik. Arsyet e tronditjes janë të thjeshta dhe të përligjura. Ajo në fund të ditës ishte nënë e dy fëmijëve por dhe një funksionare shteti që punonte në sistemin e drejtësisë. Për fat të keq u vra paradoksalisht nga mosfunksionimi i sistemit ku ajo ishte e punësuar. U vra jo për faj të saj, por të sistemit të ngritur nga politika në këto 25-vite.

Dhimbja është e para për fëmijët dhe familjen, të cilës dua t’i shpreh ngushëllimet më të sinqerta, e këtë nuk e bëj për vota, as për të fshehur ndonjë të pabërë, sepse asnjëra nuk është pjesë e punës simë. E bëj sepse e ndjej dhe sepse ky sistem drejtësie mund të më vrasë edhe mua nesër

Krejt e kundërta ndodhi sot me politikën. Duke filluar me Berishën e Bashën (nga i pari kemi peshqesh këtë sistem drejtësie ku nga vendimi i kolegut në gjyq, mbetet e vrarë një gjyqtare jashtë salle), e duke vazhduar me kryetaren e LSI-së Monika Kryemadhi, ministri i së cilës amnistoi killerin e sotëm bashkë me Presidentin i cili vetëm dekorata nuk iu dha gjyqtarëve sot.

Të gjithë dolën dhe i lanë fajin shtetit, duke e trajtuar sipas interesit me emra të përveçëm, kur në fakt fajin e ka vendimi gjyqësor, sistemi ynë i cili nuk është i kalbur, por është vrastar. Të tmerron fakti teksa mëson faktin se kur është gjykuar herën e parë ish-bashkëshorti i Hafizit, është dënuar nga gjykata me vetëm 3 vjet heqje lirie për krimin e armëmbatjes pa leje (që parashikohet deri në 7 vjet heqje lirie nga ligji) dhe dhunës në familje (që parashikohet deri në 5 vjet heqje lirie nga ligji).

Pra, në kohën kur vrasësi i sotëm duhet të ishte dënuar me 12 vjet heqje lirie (burg), denohej me vetëm 3 vjet. E si për ti vënë kapakun kësaj maskarade të drejtësisë, i dënuari me 3 vjet, do të amnistohej vetëm një vit pas dënimit nga ministri i drejtësisë (Ylli Manjani) dhe Presidenti i Republikës (Bujar Nishani).

Sot, këta që kanë ngritur këtë sistem dhe që s’kanë lënë gjë pa bërë që të mos shembet, e vranë sërish të ndjerën Hafizi, duke i qarë të koka. Pasi e vranë nga sistemi që krijuan, e rivrasin duke e trajtuar si kapital politik për të sulmuar kundërshtarët. Pasi e vranë ditën, po e qajnë natën.

Flogert Muça