Fatet ekstremisht të ndryshme të dy djemve të familjes Klinton

Duket si një histori jo edhe aq e panjohur familjare. Njëri djalë është shumë i suksesshëm në punë e shoqëri, tjetri njihet si delja e zezë me probleme të përhershme dhe mungesë përgjegjësie.

Duket pastaj si skenar filmi kur njëri djalë është President i Shteteve të Bashkuara, kurse tjetri një pijanec që arrestohet shpesh nga policia dhe përfundon burgjeve pasi shkel vazhdimisht ligjin.

E kam fjalën për Bill dhe Roger Clinton dhe historitë e tyre të viteve 90.

E gjthë media amerikane po i rikthehet kësaj historie, sepse Roger Clinton është arrestuar, se po i jepte makinës në gjendje të dehur në Califonia, ndërsa jemi vetëm një ditë përpara votimit të fundit për garën presidenciale brenda Partisë Demokratike.

Si një ëndërr e keqe nga vitet 90, i harruar nga media dhe historia, Roger Clinton është rishfaqur për t’i prishur punë kësaj here jo të vëllait por kunatës.

Në vitin 2001, pak përpara se të mbaronte mandati i tij presidencial Bill Clinton bëri një akt të pashoq për një president amerikan: ia fali dënimit vëllait të tij, që ndodhej në burg për drejtim automjeti në gjendje të dehur, në mënyrë të përsëritur.

Vellai dhe vellaiImazhi i një vëllai president e njeriu më i fuqishëm i botës ndërsa tjetri i plasur në burg është i jashtëzakonshëm. Rasti më ekstrem në rivalitetin e natyrshëm mes vëllezërve, kur suksesi i njërit sikur frymëzon sjelljen anti-sociale të tjetrit.

Bashkë me këtë histori po ngjallet nga viti 90 është humori që vjen bashkë me të. Si edhe shprehja, që jo gjithnjë thuhet për humor se: “Në burg ka përfunduar Klintoni i gabuar”.

Nuk dihet sesa do të luajë rol arrestimi, përveçse ringjalljes së fantazmave të viteve 90, si Monica Lewinsky, që po ndodh bashkë me kthimin e familjes Clinton në vëmendjen e publikut kombëtar amerikan.

Megjithë parashikimet këto skandale nuk ia kanë dëmtuar shanset politike familjes Clinton në vitet 90 dhe ndoshta nuk do t’ia dëmtojnë edhe kësaj here. Në të kundërt, duket sikur publikut i pëlqen cirku që rrethon mesazhin politik. Në fund të fundit, ky është një vend që ka si alternativë tjetër, një njeri që vërtet vjen nga bota e “Reality Shows”.

Mbështetës të Bernie Sanders dhe Donald Trump po ankohen se media nuk po i kushton vëmendje sa duhet ngjarjes për të mbrojtur kandidaten e tyre të preferuar. Po nuk kam gjetur ende ndonjë burim që nuk e ka dhënë lajmin. Media i dashuron këto incidente dhe mesa duket po ashtu edhe lexuesi e telespektatori.

Me këtë arrestim mund të thuhet se vitet 90 janë kthyer zyrtarisht. Nuk është çudi që bashkë me to të vijë edhe rikthimi i familjes Clinton në Shtëpinë e Bardhë, për lumturinë e disave dhe tmerrin e të tjerëve.

Marrë nga “illyriapress.com”