Ish-kreu i Arkivës në ministrinë e Brendshme, Kastriot Dervishi publikon një dokument të rrallë në lidhje me heroinën Shote Galica

Ish- kreu i Arkivës në ministrinë e Brendshme, Kastriot Dervishi publikon një dokument të rrallë në lidhje me heroinën Shote Galica. Në të thuhet se shteti shqiptar ka ndihmuar me franga ari gruan se Azem Galicës, Shoten. 1925/Financimi i Shote Galicës nga shteti shqiptar

Ky është një nga dokumentet e Zyrës Sekrete të Ministrisë së Punëve të Brendshme, i datës 14.12.1925 që tregon pagesën e 60 frangave ari për gruan e Azem Galicës.  Pagesa është bërë nga fondet e fshehta që posedonte kjo ministri, me miratim të zëvendësisht ministrit të Punëve të Brendshme, Musa Juka.  Gjatë diktaturës komuniste, vazhdimisht thuhej se Shota u përndoq dhe u la në harresë nga “regjimi antipopullor i Ahmet Zogut”.

Shote Galica, emëruar në lindje si Qerime (Halil) Radisheva, (1895 – 1927)

Ishte luftëtare e shquar e çetave kryengritëse kosovare për çlirimin dhe bashkimin kombëtar të të gjitha viseve shqiptare dhe për një regjim shtetëror demokratik në Shqipëri, Heroinë e Popullit. Pa përfillur terrorin e armikut dhe ligjet e ashpra të fesë e të kanunit luftoi heroikisht për 12 vjet me radhë kundër pushtuesve serbë, austrohungarezë e bullgarë.

Shote Galica mori pjesë në më shumë se 40 aksione të rëndësishme kundër armikut. Kundërshtoi me konsekuencë politikën e dhunës e të terrorit të regjimit shovinist të Beogradit ndaj popullsisë shqiptare, shpronësimin e shpërnguljen e saj dhe kolonizimin sllav të trevave shqiptare. Më 1919 mori pjesë në Kryengritjen e Rrafshit të Dukagjinit, ndërsa më 1922-1923 luftoi për mbrojtjen e Zonës Neutrale të Junikut, e cila shërbente si bazë për kryengritjen e Kosovës e të Malësisë. Në korrik 1924 mori pjesë në mbrojtjen e zonës së lirë të Drenicës (Arbanisë së Vogël). Në korrik 1924 pas vdekjes së të shoqit Azem Galicës, vazhdoi luftimet në krye të çetës së tij. Së bashku me qindra luftëtarë të Kosovës në dhjetor të 1924 luftoi kundër ushtrive intervencioniste serbe e bjellogardiste dhe forcave të Ahmet Zogut. Humbi në luftime nga masakrat e shovenistëve serbë 22 anëtarë të familjes.

Më 3 korrik 1927 Shote Galica u vendos në Shqipëri, ku vdiq në Fushë Krujë e braktisur nga qeveria e Zogut.